港鐵又加價！ 5個你必須知道的優惠

近日聽到港鐵話要換車廂，都知佢差唔多又加價。港鐵按照有加冇減…吖…講錯……係可加可減機制，宣布會由 6 月 21 日起加價，平均加幅 4.3%，更有部分路線加幅高達 6%！

大部分乘客（約四成人）每程車費增加 1 至 2 毫，但都有大約兩成乘客，會增加到 5 毫或以上。不過港鐵亦表示，加價同時會推出 5 億元新優惠，記者就同大家睇睇有咩優惠啦。

優惠 1：特別節日成人半價

第一個優惠叫「港鐵節折賞」，6 日特別節日持八達通乘搭港鐵就會有折。呢 6 日分別係今年聖誕節（12 月 25、＿26 號），16 年新年年初二、初三（2 月 9、10 號）同復活節（3 月 25、26 號）。

大家要記實呢 6 個日子，因為到時用成人八達通搭港鐵可以用小童優惠價，而用其他八達通就有 1 蚊 1 程嘅優惠。

優惠 2：第二程車費 9 折

港鐵會再度推出為期 5 個月嘅即日第 2 程車費 9 折優惠。優惠會由開始加價嘅 6 月 21 號開始，到 11 月底。港鐵就話預期每日會有 170 萬人受惠。

優惠 3：延長都會票優惠

都會票優惠會延長一年，至明年 6 月 30 日為止，但票價就由 $400 蚊加到 $415。持都會票嘅乘客可以30日內於指定範圍車站搭40程，多打工仔使用。

優惠 4：買都會票送 $50 現金券

今年 7 月同 8 月期間，買都會票同其他月票都可以獲得一張港幣 $50 嘅港鐵車站商店購物現金券。

優惠 5：延長早晨折扣優惠

港鐵會將早晨折扣優惠延長至明年 5 月 31 日。早晨折扣優惠指，用成人八達通搭港鐵，逢星期一到五（非公眾假期），早上 7:15 至 8:15 在指定範圍內車站出閘，就即享車費 75 折嘅早晨折扣。

雖然聽落港鐵就話用咗超過 5 億提供優惠，但睇真就會發現個個優惠都好多限制。好似打工仔如果用都會票返工，就唔會享受到早晨優惠同第 2 程 9 折。

所以雖然有 5 項優惠，但每個人能夠實際受惠嘅其實都係得兩三項。仲有半個月左右，記者都要開始計一計要點搭先可以享受到最多優惠喇。

原文刊於：ezone.hk